پنوعاقل: پولیس چوکی پر ڈاکوؤں کا حملہ، ایک اہلکار شہید، دوسرا زخمی 

پنو عاقل؍ سکھر (این این آئی) کچے کے علاقے میں پولیس چوکی پر ڈاکوئوں کے حملے میں ایک پولیس اہلکار شہید اور دوسرا زخمی ہوگیا۔ وزیر داخلہ سندھ ضیاء الحسن لنجار نے ایس ایس پی سکھر سے واقعہ کی تفصیلات طلب کرلیں۔ ضیاء الحسن لنجار نے ایس ایس پی سکھر کو ہدایت کی کہ شہید اہلکار کے گھر تعزیت کے لیے جائیں جبکہ زخمی کے علاج معالجے میں کوئی کسر نہ چھوڑی جائے۔ وزیر داخلہ نے کہا کہ ڈاکوئوں کے خلاف جاری آپریشن کو مزید ٹھوس اور موثر بنایا جائے۔ پولیس کے مطابق  ڈاکوئوں نے  سندھ کے شہر پنوعاقل کے علاقے گدپور کے کچے میں امن و امان کیلئے قائم کی گئی پولیس چوکی پر جدید اسلحے سے حملہ کیا۔  پولیس کی بھاری نفری کچے میں ڈاکوئوں کے تعاقب میں پہنچ گئی تاہم ڈاکو فرار ہوچکے تھے۔ حملے میں شہید پولیس اہلکار کی شناخت اربیلو چاچڑ کے نام سے ہوئی جبکہ  زخمی اہلکار رضا محمد ہے جسے فوری طبی امداد کے لیے سپتال منتقل کردیا گیا۔