لاہور (سپورٹس رپورٹر) سربیا کے شہرہ آفاق ٹینس اسٹار نوواک جوکووچ نے آسٹریلین اوپن کی تیاری کیلئے اپنے سابق انگلش حریف اینڈے مرے کو کوچنگ سٹاف میں شامل کرلیا۔ 24مرتبہ کے گرینڈ سلیم فاتح نوواک جوکوچ نے کہا اینڈے مرے کوچنگ سٹاف کا حصہ ہونگے۔ آسٹریلین اوپن میں ان کے کوچ ہونگے۔ انہوں نے کہا ہم نے ایک دوسرے کیخلاف اس وقت سے کھیلا جب ہم کم عمر تھے اور 25 سال تک حریف رہے اور ایک دوسرے سے آگے نکلنے کی کوشش کرتے رہے ہیں۔ ہمارے درمیان چند ایک یادگار مقابلے بھی ہوئے ہیں۔ ہمیں گیم چینجر، رسک ٹیکرز اور تاریخ بنانے والے کہا گیا اور میرے خیال میں ہماری کہانی اب ایک نئے باب میں تبدیل ہوگئی ہے۔سربیا کے سٹار جوکووچ نے کہا اب وقت آگیا ہے کہ میں اپنے ایک سخت حریف کو اپنے ساتھ ملا لوں اور کوچ کی حیثیت سے اینڈے مرے کو خوش آمدید کہوں گا۔