لاہور (نوائے وقت رپورٹ+ نامہ نگاران) لیسکو کی حدود میں غیراعلانیہ لوڈشیڈنگ کا سلسلہ شدت سے جاری ہے۔ موسم بہتر ہو گیا پنکھے اور اے سی بند ہو گئے لیکن پھر بھی لوڈشیڈنگ کا عذاب جاری ہے۔ شہریوں نے شکوہ کیا ہے کہ بجلی کی لوڈشیڈنگ کے باوجود بل بہت زیادہ آ رہے ہیں۔ سرگودھا، گڑھ مہاراجہ، وہاڑی سے  نامہ نگاروں کے مطابق لوڈشیڈنگ میں ایک بار پھر اضافہ ہو گیا جس پر شہری سراپا احتجاج بن گئے۔ سرگودھا سے نامہ نگار کے مطابق ہر گھنٹے بعد دو گھنٹے کی لوڈشیڈنگ اور دیہی علاقوں میں مسلسل پانچ گھنٹے تک بجلی کی بندش کے باعث تمام کاروبار زندگی معطل ہو کر رہ گیا۔ طلبہ اور طالبات کو پڑھائی میں مشکلات کا سامنا ہے۔ وہاڑی سے نامہ نگار کے مطابق اذیت ناک لوڈشیڈنگ نے شہریوں کو بددعائیں دینے پر مجبور کر دیا۔ گڑھ مہاراجہ سے نامہ نگار کے مطابق لوڈشیڈنگ دورانیہ 18گھنٹے تک پہنچ گیا۔