سنگاپور(آئی این پی)ڈبلیو ٹی اے فائنلز ٹینس ٹورنامنٹ میں ایلینا سویٹولینا نے مسلسل دوسری کامیابی حاصل کر لی۔ دفاعی چیمپئن کیرولین وزنائیکی نے پیٹرا کویٹووا کو ہرا کر ایونٹ میں کم بیک کیا۔ کویٹووا کو متواتر دوسری شکست کا سامنا کرنا پڑا۔سنگاپور میں جاری سیزن کے آخری ڈبلیو ٹی اے فائنلز ٹینس ٹورنامنٹ کے سلسلے میں کھیلے گئے وائٹ گروپ کے ایک میچ میں یوکرینی کھلاڑی ایلینا سویٹولینا نے عمدہ کارکردگی کا مظاہرہ کرتے ہوئے حریف جمہوریہ چیک کی کھلاڑی کیرولینا پلسکووا کو زبردست مقابلے کے بعد 6-3، 2-6 اور 6-3 سے ہرا کر مسلسل دوسری کامیابی سمیٹی، سویٹولینا نے پہلے میچ میں پیٹراکویٹووا کو شکست دی تھی۔اسی گروپ کے دوسرے میچ میں ڈنمارک کی سٹار کھلاڑی اور دفاعی چیمپئن کیرولین وزنائیکی نے جمہوریہ چیک کی پیٹراکویٹووا کو سخت مقابلے کے بعد 7-5، 3-6 اور 6-2 سے زیر کر کے کم بیک کیا۔