اسلام آباد (خبرنگار خصوصی) رئیر ایڈمرل میاں ذاکر اللہ جان نے بطور کمانڈر کراچی ذمہ داریاں سنبھال لیں۔ ترجمان بحریہ کے مطابق کراچی میں منعقدہ ایک پروقار تقریب میں کمانڈر کراچی کی ذمہ داریاں سنبھال لیں۔ تقریب میں وائس ایڈمرل اویس احمد بلگرامی نے کمان نئے تعینات ہونے والے کمانڈر کراچی کے حوالے کی۔ بطور کمانڈر کراچی رئیر ایڈمرل میاں ذاکر اللہ جان کراچی میں قائم پاک بحریہ کے تمام تربیتی یونٹس کے انچارج ہوں گے۔ رئیر ایڈمرل میاں ذاکر اللہ جان نے1990 میں پاک بحریہ کی آپریشنز برانچ میں کمیشن حاصل کیا۔ وہ ایک شاندار کیرئیر کے حامل ہیں اور متعدد کمانڈ اینڈ اسٹاف عہدوں پر فائز رہ چکے ہیں۔ ان کی کمانڈ تعیناتیوں میں کمانڈنگ افسر 27اسکواڈرن، ہیڈ کوارٹر نیو سینٹ بحرین میں این3  ائیر، ہیڈ آف پی تھری سی مشن امریکہ، ڈائریکٹر نیول ایوی ایشن اور پراجیکٹ ڈائریکٹر ایگل فورٹ شامل ہیں۔ انہوں نے بطور اسسٹنٹ چیف آف نیول اسٹاف (آپریشنل پلانز)، نیشنل ڈیفنس یونیورسٹی میں ڈائریکٹنگ اسٹاف، وزارت دفاعی پیداوار میں ڈائریکٹر جنرل ڈیفنس پرچیز، چیف اسٹاف آفیسر ٹو کمانڈر پاکستان فلیٹ، ڈپٹی چیف آف نیول اسٹاف (ایڈمن) اور نیول سیکرٹری بھی اپنے فرائض انجام دئیے۔ کمانڈر کراچی کے عہدے پر فائز ہونے سے قبل وہ نیول ہیڈ کوارٹرز اسلام آباد میں ڈپٹی چیف آف نیول اسٹاف (ٹریننگ اینڈ پرسنل) کی ذمہ داریاں سر انجام دے رہے تھے۔ رئیر ایڈمرل میاں ذاکر اللہ جان نے پاکستان نیوی وار کالج سے وار اسٹڈیز میں گریجویشن اور نیشنل ڈیفنس یونیورسٹی سے نیشنل سیکیورٹی اینڈ وار اسٹڈیز میں ایم ایس سی کی ڈگری حاصل کی۔ انہوں نے نیشنل ڈیفنس یونیورسٹی امریکہ سے بھی نیشنل سیکیورٹی اینڈ ریسورسز اسٹریٹجی میں ایم ایس کی ڈگری حاصل کر رکھی ہے۔ رئیر ایڈمرل میاں ذاکر اللہ جان کو ان کی شاندار خدمات کے اعتراف میں ہلال امتیاز  ملٹری سے بھی نوازا جا چکا ہے۔ تبدیلی کمان کی تقریب میں رئیر ایڈمرل میاں ذاکر اللہ جان کو گارڈ آف آنر پیش کیا گیا اور زیر کمان یونٹس کے کمانڈنگ افسران سے ان کا تعارف کروایا گیا۔ تقریب میں پاک بحریہ کے افسران، سی پی اوز، سیلرز اور سویلینز نے شرکت کی۔