لاہور(سپورٹس رپورٹر)ایشین کرکٹ کونسل ایمرجنگ ٹیمز ٹی20 ایشیا کپ کے پہلے سیمی فائنل میں سری لنکن اے نے پاکستان شاہینز کو  سات وکٹوں سے شکست دیکر فائنل میں جگہ پکی کرلی۔گرین شرٹس نے 9 وکٹ پر 135 رنز بنائے۔ عمیر بن یوسف نے 68 رنز کی اننگز کھیلی۔حیدر علی 14، محمد عمران 13 اور عرفات منہاس 10 رنز کے سوا کوئی اور کھلاڑی سری لنکا کی بائولنگ کے سامنے نہ ٹھہر سکا۔یاسر خان دو ‘کپتان محمد حارث چھ ‘قاسم اکرم صفر ‘عبد الصمد صفر ‘عباس آفریدی نو ‘صفیان مقیم چار‘شاہنواز دھانی صفر تک محدود رہے ۔ سری لنکا نے  ہدف 17ویں اوورز میں 3 وکٹوں پر پورا کرلیا ۔اہان وکرما سنگھے 52 رنز کیساتھ ناقابل شکست رہے۔ افغانستان اے نے بھارت اے کو 20 رنز شکست دیکر فائنل کیلئے کوالیفائی کرلیا۔بھارتی ٹیم 6 وکٹوں پر 169 رنز بناسکی۔ افغانستان نے 4 وکٹوں پر 206 رنز بنائے تھے۔فائنل کل افغانستان  اور سری لنکا  کے درمیان کھیلا جائیگا۔