لاہور (نمائندہ خصوصی) حالیہ دہشت گردی کے پیش نظر محکمہ انسداد دہشتگردی (سی ٹی ڈی) نے پنجاب بھر میں مختلف کارروائیوں کے دوران 8 دہشتگرد گرفتار کر لیے۔ تفصیلات کے مطابق سی ٹی ڈی نے صوبہ بھر میں 39 انٹیلی جنس بیسڈ آپریشن کے دوران 40مشکوک افراد سے پوچھ گچھ کی جبکہ 8مبینہ دہشت گرووں کو گرفتار کر لیا۔ ترجمان سی ٹی ڈی کے مطابق لاہور میں کارروائی کے دوران4 دہشتگردوں کو گرفتار کیا گیا جن کا تعلق کالعدم تنظیم سے ہے۔ جب کہ دہشتگردوں سے بارودی مواد، اسلحہ اور دیگر سامان برآمد ہوا ہے۔ گرفتار ہونے والوں میں مشتاق، سمیع اللہ عادل جمال اور اسامہ خالد شامل ہیں۔ ترجمان  سی ٹی ڈی کے مطابق شیخوپورہ سے بھی دو دہشتگردوں کو گرفتار کیا گیا ہے۔ جب کہ حافظ آباد سے اور گوجرانوالہ سے بھی ایک ایک دہشت گرد کو گرفتار کیا گیا۔ سی ٹی ڈی نے تمام دہشت گردوں کو گرفتار کر کہ تفتیش کے لیے نامعلوم مقام پر منتقل کر دیا۔