کلر سیداں (نامہ نگار) پی ٹی آئی کے رکن پنجاب اسمبلی چوہدری جاوید کوثرنے کہا ہے کہ وزیر اعلی پنجاب چوہدری پرویز الہی بہت جلد کلر سیداں آ رہے ہیں جہاں وہ کلر سیداں دہانگلی روڈ کی تعمیر و توسیع کا سنگ بنیاد رکھیں گے۔ان خیالات کا اظہار انہوں نے گزشتہ روز گورنمنٹ گرلز ہائیر سیکنڈری سکول چوآ خالصہ کے دورہ کے موقع پر میڈیا سے گفتگوکرتے ہوئے کیا۔اس موقع پر انہوں نے نئی زیر تعمیر بلڈنگ کا بھی معائنہ اور تعمیراتی کام کا جائزہ لیا۔اس موقع پر انہوں نے بلڈنگز ڈیپارٹمنٹ کے متعلقہ حکام پر واضح کیا کہ وہ بلڈنگ کی تعمیر میں کسی قسم کی کرپشن کو برداشت نہیں کریں گے اور انہیں موجودہ ایس او پیز کے تحت کام کرنے کی ہدایت جاری کی۔ایک سوال کے جواب میں ایم پی اے نے کہا ہے کہ کلر دانگلی روڈ کی تعمیر و توسیع کیلئے گورنمنٹ کنٹریکٹرز سے پری کوالیفکیشنز طلب کر لی گئی ہیں جس کے بعد جلد ٹینڈر بھی جاری ہو جائے گا جس کا باضابطہ سنگ بنیاد وزیر اعلی پنجاب چوہدری پرویز الہی کریں گے۔