گوجرانوالہ (نمائندہ خصوصی)ایس ایس پی آپریشنز فراز احمد کی سربراہی میں سی پی او آفس کانفرنس ہا ل میں میٹنگ کا انعقاد کیا گیا۔میٹنگ میں ایس پی سول لائنز رضوان طارق اور گوجرانوالہ کے مختلف کالجز کے پرنسپلز ودیگران نے شرکت کی۔ایس ایس پی آپریشنز فراز احمد نے میٹنگ میں انسپکٹر جنرل آف پولیس ڈاکٹر عثمان انور کی ہدایت پر جاری کیے گئے پروگرامز، یوتھ انٹرن شپ پروگرام اور فرینڈز آف پولیس پروگرام بارے بریفنگ دی۔ دونوں پروگرامز کا مقصدعوام کا پولیس پر اعتماد بحال کر کے پولیس فورس اور کمیونٹی کے درمیان حائل فرق کو ختم کرنا ہے۔انٹرنشپ پروگرام کے تحت مختلف سکولز، کالجز اور یونیورسٹیز سے طلبا وطالبات کو چن کر ان کو پولیس ورکنگ کے متعلق آگاہی دینا ہے اور پروگرام کے اختتام پر کامیاب طلبا وطالبات کو سرٹیفیکیٹ دیا جائے گا جو ایسے طلبا وطالبات کے لیے مستقبل میں کارآمد ثابت ہو گا۔فرینڈ آف پولیس پروگرام کے تحت مثبت سوچ اورمتاثر کن شخصیت کے حامل افراد کے ذریعہ سے عوام میں پولیس کے مثبت پہلوکو فروغ دیا جائے گا۔