لاہور(سپورٹس رپورٹر)پاکستان کرکٹ بورڈ کے زیر اہتمام چیمپئنز ون ڈے کپ کے پہلے ایلمینیٹر میچ میں لائنز نے سٹالینز کو12رنز سے شکست دیکر ایونٹ سے باہر کر دیا ۔ فیصل آباد کے اقبال سٹیڈیم میں کھیلے جانیوالے میچ میں لائنز نے ٹاس جیت کر بیٹنگ کا فیصلہ کیا اور 9 وکٹوں پر 263 رنز بنائے۔ احمد دانیال نے 65 رنز کی نمایاں اننگز کھیلی، کپتان امام الحق 23، محمد طلحہ 47، شارون سراج 38 جبکہ عامر یامین 46 رنز بناکر آؤٹ ہوئے۔ عبید شاہ نے 3 ، عادل امین اور معاذ صداقت نے 2،2 جبکہ حارث رؤف نے ایک وکٹ حاصل کی۔جواب میں سٹالینز کی ٹیم 251رنز بناسکی ۔ یاسر خان 39‘حسین طلعت 32‘طیب طاہر 28‘محمد محسن 30‘محمد حارث 30‘جہانداد خان 36رنز بناکر نمایاں رہے ۔ احمد دانیال ‘خوشدل شاہ نے تین تین کھلاڑیوں کوآئوٹ کیا ۔ احمد دانیال کو میچ کا بہترین کھلاڑی قرار دیا گیا ۔ دوسرے ایلیمینیٹر میں کل مارخورز اور لائنز کے درمیان کھیلا جائیگا۔فاتح ٹیم فائنل میں پہنچ جائیگی ۔