فیصل آباد‘ گوجرہ ( نمائندہ خصوصی+ نمائندہ نوائے وقت) گوجرہ میں پولیس کے ساتھ مبینہ مقابلہ میں ساتھیوںکی فائرنگ سے ایک ڈاکو ہلاک، دو  فائرنگ کرتے ہوئے فرار ہو نے میں کامیاب ہو گئے۔ علاقہ چک نمبر 354 ج ب کے قریب تین نامعلوم ڈاکوئوں نے روڈ پر ناکہ لگا کر راہ گیروں کو لوٹنے کی کوشش کی جس کی اطلاع ملتے ہی تھانہ صدر پولیس گوجرہ موقع پر پہنچ گئی۔ ڈاکوئوں نے پولیس کو دیکھتے ہی اندھا دھند فائرنگ شروع کردی۔ جبکہ پولیس نے بھی حفاظت خود اختیاری کے تحت فائرنگ کی۔ فائرنگ رکنے پر ایک ڈاکو مردہ حالت میں پایا گیا۔ جبکہ اس کے دو ساتھی فرار ہو گئے۔ پولیس نے نعش ہسپتال منتقل کردی جس کی شناخت حسنین ولد خورشید عالم سکنہ چک نمبر372ج ب نام سے ہو ئی ہے جو مختلف تھانوں میں درج مقدمات میں مطلوب تھا۔ فیصل آباد میں پولیس مقابلے میں ریکارڈ یافتہ ایک ڈاکو ہلاک اور ایک زخمی ہو گیا جبکہ دو فرار ہو گئے۔ میٹروپول چوک کے قریب ڈولفن فورس ٹیم نے موٹر سائیکل سوار چار مشکوک افراد کو چیکنگ کے لیے روکنے کی کوشش کی تو ملزموں نے اہلکاروں پر فائرنگ کر دی۔ واقعہ کی اطلاع ملتے ہی پولیس کی بھاری نفری نے موقع پر پہنچ کر علاقے کو گھیرے میں لے لیا۔ دو طرفہ فائرنگ رکنے کے بعد ایک ڈاکو ہلاک اور ایک زخمی حالت میں گرفتار کر لیا گیا جبکہ ان کے دو ساتھی فرار ہونے میں کامیاب ہو گئے۔ زخمی ڈاکو کو ہسپتال منتقل کر دیا گیا ہے، مرنے والا ڈاکو 9 مدمات میں مطلوب‘ ڈاکو کی شناخت شمروز ولد نعیم ساکن ایوب ریسرچ کے نام سے ہوئی ہے۔