لاہور (سپورٹس رپورٹر) ایف ایم سی انٹرنیشنل سکواش چیمپئن شپ کا فائنل آج ٹاپ سیڈ ناصر اقبال اور عامر اطلس خان کے مابین کھیلا جائے گا۔ پنجاب سکواش کمپلیکس میں کھیلے گئے پہلے سیمی فائنل میں ناصر اقبال نے ہم وطن فرحان زمان کو بآسانی 34 منٹ میں 11-6-11-6-11-8 کے سکور سے شکست دی۔ دوسرے سیمی فائنل میں سیکنڈ سیڈ عامر اطلس اور فرحان محبوب کے مابین کانٹے دار مقابلہ دیکھنے کو ملا۔ عامر اطلس نے پہلی گیم جیت کر میچ میں برتری حاصل کی۔ دوسری گیم میں فرحان محبوب نے شاندار کھیل پیش کرتے ہوئے کم بیک کیا اور گیم جیت کر مقابلہ ایک ایک گیم سے برابر کر دیا۔ تیسری گیم میں بھی دونوں کھلاڑیوں نے ایڑی چوٹی کا زور لگایا تاہم تجربہ کار عامر اطلس سخت مقابلے کے بعد گیم جیتنے میں کامیاب رہے جس کے بعد فرحان محبوب زیادہ مزاحمت نہ کر سکے اور 55 منٹ کے مقابلے میں 11-7-10-12-12-10-11-9 کے سکور سے شکست کھاکر ایونٹ سے آﺅٹ ہوگئے۔ فائنل میچ آج ناصر اقبال اور عامر اطلس کے مابین سہ پہر چار بجے کھیلا جائے گا۔