کراچی: گڑھے میں نہاتے 2بھائیوں سمیت 5بچے جاں بحق، 3کو بچالیا

کراچی (صباح نیوز) کراچی میں 5 بچے پانی کے گڑھے میں نہانے کے دوران ڈوب کر جاں بحق ہو گئے۔ ریسکیو عملے نے 3 کو زندہ بچا لیا جنہیں طبی امداد کیلئے ہسپتال منتقل کر دیا گیا۔ ریسکیو حکام کے مطابق کراچی کے علاقے سرجانی سیکٹر سیون ڈی میں 5 بچے پانی سے بھرے گڑھے میں نہا رہے تھے کہ توازن برقرار نہ رکھنے کے باعث ڈوب کر جانیں گنوا بیٹھے۔ جاں بحق بچوں میں 2 سگے بھائی بھی شامل ہیں۔ پانچ بچوں کی ہلاکت پر علاقے میں کہرام مچ گیا۔ ریسکیو عملے کے مطابق 3 بچوں کو زندہ بچا لیا گیا۔ جاں بحق ہونے والے بچوں کی عمریں 9 سے 14 سال کے درمیان ہیں۔ پولیس نے مزید بتایا کہ ڈوبنے والے تمام بچوں کی لاشیں نکال لی گئیں جن کی شناخت اسید، مقصود، زبیر، ارمان اور عبد اللہ کے نام سے ہوئی۔