اسلام آباد (نوائے وقت رپورٹ) پاکستانی سیاست پر گہری نظر رکھنے والی شہید محترمہ بینظیر بھٹو کی بڑی صاحبزادی بختاور بھٹو نے وزیراعلیٰ پنجاب مریم نواز کی جانب سے پولیس فورس میں خواتین کی نمائندگی میں اضافے کو خوب سراہا۔ گزشتہ روز وزیراعلیٰ مریم نواز نے پنجاب پولیس کی وردی پہن کر پولیس ٹریننگ کالج چوہنگ کی پاسنگ آؤٹ پریڈ میں شرکت کی جس کی تصاویر اور ویڈیوز سوشل میڈیا پر وائرل ہیں۔ وائرل ویڈیوز میں ایک میں مریم نواز کی پولیس ٹریننگ کالج چوہنگ کی پاسنگ آؤٹ پریڈ میں کی گئی تقریر نے بھی بختاور بھٹو کی توجہ حاصل کر لی۔ وزیراعلیٰ پنجاب کی اس تقریر نے بختاور بھٹو کو بھی متاثر کیا ہے۔ انہوں نے ایکس پر وائرل کلپ ری شیئر کرتے ہوئے لکھا کہ ’’بہت عمدہ، پولیس فورس میں خواتین کی مساوی نمائندگی قابل ستائش عمل ہے۔‘‘