ٹوئٹر نے صدر عارف علوی، مراد سعید کے اکائونٹس بند کرنے کی بھارتی درخواست مسترد کردی

اسلام آباد (صباح نیوز+نیٹ نیوز) ٹوئٹر نے صدر مملکت ڈاکٹر عارف علوی کے کشمیر سے متعلق بیانات کے خلاف درخواست مسترد کر دی۔صدر عارف علوی مقبوضہ کشمیر میں بھارتی جارحیت کے معاملے پر سوشل میڈیا پر بہت زیادہ متحرک ہیں اور اس حوالے سے متعدد ٹوئٹس بھی کر چکے ہیں۔صدر مملکت کے ٹوئٹر بیانات پر ان کا اکاؤنٹ بلاک کرنے کے لیے درخواست دی گئی جسے ٹوئٹر انتظامیہ نے مسترد کر دیا ہے۔ٹوئٹر کی جانب سے صدر عارف علوی کے نام پیغام میں کہا گیا ہے کہ تحقیقات کی گئی لیکن کوئی خلاف ورزی سامنے نہیں آئی۔وفاقی وزیر برائے انسانی حقوق شیریں مزاری نے ٹوئٹر کی جانب سے بھیجی گئی ای میل کا ایک اسکرین شاٹ اپنے سوشل میڈیا اکاؤنٹ کے ذریعے شیئر کرتے ہوئے سوشل میڈیا پلیٹ فام کو تنقید کا نشانہ بناتے ہوئے لکھا کہ ٹوئٹر مودی سرکار کا آلہ کار بننے میں واقعی بہت آگے جا چکا ہے، انہوں نے ہمارے صدر کو بہت ہی برے اور مضحکہ خیز انداز میں نوٹس بھیجا۔خیال رہے کہ بھارت نے 5 اگست کو مقبوضہ کشمیر کی خصوصی حیثیت سے متعلق آرٹیکل 370 راجیہ سبھا میں پیش کرنے سے قبل ہی صدارتی حکم نامے کے ذریعے ختم کر دیا تھا۔بھارت نے اس اقدام کے ذریعے مقبوضہ جموں و کشمیر اور لداخ کو دو حصوں میں تقسیم کر کے بھارتی یونین میں شامل کر لیا تھا۔مودی سرکار نے اس اقدام کے خلاف بڑے پیمانے پر مظاہروں کے خوف کے پیش نظر مقبوضہ کشمیر میں غیر معینہ مدت کے لیے کرفیو نافذ کر کے کشمیری رہنماؤں کو گھروں میں نظر بند یا جیلوں میں قیدر کر رکھا ہے۔بھارتی حکومت کے اقدامات کو نا صرف بھارت میں بلکہ پوری دنیا میں تنقید کا نشانہ بنایا جا رہا ہے جب کہ حریت رہنماؤں اور حکومت پاکستان نے عالمی برادری سے بھارت کے غیر آئینی اقدامات کا نوٹس لینے کا مطالبہ کیا ہے۔ دریں اثناء ٹویٹر انتظامیہ نے بھارتی حکومت کی جانب سے مراد سعید کا اکائونٹ بند کرنے کی درخواست مسترد کردی۔ وفاقی وزیرمواصلات مراد سعید نے مقبوضہ وادی کے بد ترین حالات پر ٹویٹ کیا تھا جس کے رد عمل میں بھارتی حکومت نے ٹویٹر انتظامیہ سے مراد سعید کا اکائونٹ بند کرنے کی درخواست کر دی۔دوسری جانب بھارتی وزارت داخلہ کی جانب سے شکایت موصول ہونے پر ٹویٹر انتظامیہ کا مراد سعید سے رابطہ کیا اور بھارت کی جانب سے کی گئی شکایت سے مراد سعید کو باقاعدہ آگاہ کیا۔پی ٹی آئی کے رکن قومی اسمبلی نے اپنی ٹوئٹ میں کہا تھا کہ ہم کشمیر میں بھارتی مظالم پر خاموش نہیں رہیں گے اور بھارتی جارحیت کو دنیا بھر میں بے نقاب کریں گے۔