جعفر آباد (اے پی پی+ نوائے وقت رپورٹ) صحبت پور میں بم دھماکہ، ایک پولیس اہلکارہلاک 4افراد زخمی ہوگئے، سرکاری ذرائع کے مطابق پیر کے روز بلوچستان کے علاقے ضلع صحبت پور کے علاقے حمید آباد میں بم دھماکہ ہوا جس کے نتیجے میں 2 پولیس اہلکاروں سمیت 4 افراد زخمی ہوگئے،پولیس اور سیکورٹی فورسز کو اطلاع ملتے ہی جائے وقوعہ پر پہنچ کر زخمیو ں کو فوری طور پر مقامی ہسپتال منتقل کر دیا جہاں انہیں طبی امدادی جا رہی ہے۔ پولیس اور سیکورٹی فورسز نے علاقے کی ناکہ بندی کرکے مزید تفتیش شروع کر دی ہے۔ دریں اثناء بلوچستان کے ضلع کیچ کے علاقے سنگانی سر میں دستی بم حملہ ہوا جس کے نتیجے میں 3 افراد زخمی ہو گئے۔لیویز حکام کے مطابق ضلع کیچ کے علاقے سنگانی سر میں نامعلوم شر پسندوں نے مقامی سرکاری ہسپتا ل پر دستی بم پھینکا جو زور دار دھماکے سے پھٹ گیا۔ حملے میں 3 افراد زخمی ہو گئے، جنہیں طبی امداد کے لیے کیچ کے ہسپتا ل منتقل کر دیا گیا۔