جدہ (نوائے وقت رپورٹ) پاک بحریہ کے جہاز پی این ایس ذوالفقار نے سعودی عرب کی بندرگاہ جدہ کا دورہ کیا۔ بندرگاہ آمد پر میزبان بحریہ اور پاکستانی سفارتی حکام نے جہاز کا پرتپاک استقبال کیا۔ ترجمان پاک بحریہ کے مطابق سعودی بحریہ کے کمانڈر ویسٹرن فلِیٹ کمانڈ اور کمانڈر ویسٹرن نیول ایویشن نے پی این ایس ذوالفقار کا دورہ کیا۔ میزبان حکام نے مشن کمانڈر اور جہاز کے کمانڈنگ آفیسر سے ملاقات کی۔ جس میں باہمی دلچسپی کے پیشہ ورانہ امور پر تبادلہ خیال کیا گیا۔ مشن کمانڈر نے امیرالبحر کی جانب سے سعودی عرب کے عوام بالخصوص سعودی بحریہ کیلئے خیر سگالی کا پیغام بھی پہنچایا۔ جدہ آمد سے قبل پی این ایس ذوالفقار نے بحیرہ روم میں ترک اور اطالوی بحریہ کے ہمراہ دو طرفہ بحری مشق میں حصہ لیا۔