زیارت، پنجگو ر میں دھماکے ، لیو یز رسالدار میجر، ایف سی لانس نائک سمیت 4اہلکار شہید

کوئٹہ (بیورو رپورٹ) زیارت کے علاقے میں لیویز کی گاڑی کے قریب دھماکہ میں رسالدار میجر سمیت تین لیویز اہلکار شہید جبکہ تین زخمی ہو گئے۔ لیویز کے مطابق جمعرات کو زیارت کے علاقے کچھ میں مانگی ڈیم کے قریب لیویز کی دو گاڑیوں کو سڑک کنارے نصب بم کے ذریعے نشانہ بنایا گیا جس کے نتیجے میں رسالدار میجر میر زمان، نائب رسالدار مدثر اور سپاہی زین اللہ موقع پر شہید جبکہ تین اہلکار زخمی ہو گئے۔ لیویز کے مطابق دھماکہ اس وقت ہوا جب مبینہ طور پر مانگی ڈیم سے چار افراد کو اغوا کرنے کی اطلاع پر لیویز فورس کی گاڑیاں علاقے میں جا رہی تھیں۔ زخمیوں کو کوئٹہ منتقل کر دیا گیا۔  دوسری جانب پنجگور کے بالگتر ایریا میں آئی ڈی دھماکہ میں ایف سی کا لانس نائیک شہید جبکہ نائب صوبیدار سمیت تین اہلکار زخمی ہوگئے۔ سکیورٹی ذرائع کے مطابق پنجگور بالگتر ایریا میں ایف سی کی گاڑی کے قریب آئی ڈی دھماکے کے نتیجے میں لانس نائیک اسماعیل شہید جبکہ نائب صوبیدار اسلم،  سپاہی سلام اور سپاہی تنویر زخمی ہوگئے جنہیں فوری طوپر طبی امداد کے لئے ایف سی ہسپتال تربت منتقل کردیا گیا۔ واقعہ کے بعد سکیورٹی فورسز کی بھاری نفری جائے وقوعہ پہنچ گئی۔ شواہد اکٹھے کر کے ملزمان کی تلاش شروع کر دی۔