رومانیہ میں بخارسٹ کے قریب مائع پٹرولیم گیس سٹیشن پردو دھماکوں کے نتیجے میں ایک شخص ہلا ک اور 46 زخمی ہو گئے۔ غیرملکی خبررساں ادارے کے مطابق رومانیہ کے ایمرجنسی ڈیپارٹمنٹ کے سربراہ رائد عرفات نے میڈیا کوبتایا کہ گزشتہ روز دارالحکومت کے شمال میں واقع کریوڈیا کمیون میں دھماکے اورآگ لگنے کی اطلاع کے بعد ریسکیو اہلکار پہنچے تو وہاں دوسرا دھماکہ ہوگیا جس کے نتیجے میں ایک شخص ہلاک اور 26 فائر فائٹرز سمیت 46افراد زخمی ہوگئے۔ جائے وقوعہ سے تمام لوگوں کو نکال لیا گیا ،ہلاک ہونے والے شخص اور تمام زخمیوں کو بخارسٹ کے سرکاری ہسپتال میں منتقل کر دیا گیا ۔واضح رہے کہ 2015میں رومانیہ کے ایک نائٹ کلب میں آتش بازی کے بعد آگ لگنے سے 64افراد ہلاک ہوگئے تھے۔