لاہور(سپورٹس رپورٹر)پیرس اولمپکس2024 میں نئے ریکارڈ کیساتھ پاکستان کو جیولین تھرو ایونٹ میں گولڈ میڈل دلوانے والے ارشد ندیم کی ملک گیر سطح پر پذیرائی جاری ہے۔میزان بنک کی جانب سے گزشتہ روز کراچی میں ارشد ندیم کے اعزاز میں تقریب سجائی گئی جس میں انتظامیہ نے 27 سالہ ایتھلیٹ کو 9.297 ملین (92 لاکھ 97 ہزار روپے) کی انعامی رقم دی۔ ارشد ندیم نے بنک کے بانی صدر اور سی ای او عرفان صدیقی سے چیک وصول کیا۔ ارشد ندیم کو گولڈ میڈل جیتنے والی 92.97 میٹر کی تھرو کے ہر میٹر کے عوض ایک لاکھ روپے کا انعام دیا گیا ہے جبکہ انہیں یادگاری شیلڈ اور گولڈ میڈل بھی پیش کیا گیا۔بنک کے صدر سی ایس او عرفان صدیقی اور ڈپٹی سی سی او سید عامر علی  ارشد ندیم کو شاندار الفاظ میں خراج تحسین پیش کیا۔