لاہور(سپورٹس رپورٹر) پاکستان کرکٹ بورڈ نے چیمپیئنز کپ ٹیموں کے 5 مینٹورز کا اعلان کردیا۔پاکستان کرکٹ بورڈ نے اعلان کیا ہے کہ مصباح الحق،ثقلین مشتاق،سرفراز احمد، شعیب ملک اور وقار یونس چیمپئنزکپ کی 5 ٹیموں کے مینٹور ہونگے۔ یہ ایک شفاف عمل کے ذریعے 3 سالہ معاہدے کے تحت کیا گیا ہے۔ ان کی ٹیموں اور سکواڈز کے ناموں کا اعلان مناسب وقت پرکیا جائے گا۔ پی سی بی ڈومیسٹک کرکٹ سیزن 2024-25میں ان مینٹورزکا پہلا اسائنمنٹ چیمپئنزون ڈیکپ ہوگاجو 12سے 29ستمبرتک اقبال سٹیڈیم فیصل آباد میں کھیلا جائیگا۔ ملک کے بہترین کرکٹرزسنگل لیگ کی بنیاد پر ہونے والے اس ایونٹ میں شرکت کریں گے۔ اس ایونٹ کے ساتھ ہی فیصل آباد میں تقریبا 2 سال بعد کسی مینز سینئر ایونٹ کی واپسی ہوگی۔ چیئرمین پی سی بی محسن نقوی نے کہا پانچوں مینٹورز ابھرتے ہوئے کرکٹرز کی ترقی میں اہم کردار ادا کریں گے۔