سابق وزیراعظم بے نظیربھٹوکی تیسری برسی آج منائی جارہی ہے، ملک بھرسے پیپلز پارٹی کے کارکنوں کے قافلے گڑھی خدابخش پہنچ رہے ہیں، صدر، وزیراعظم ، وزرا، ارکان اسمبلی اورکارکنوں کی بڑی تعداد نے بے نظیربھٹو کے مزارپرحاضری دی ۔ پنجاب، سندھ، بلوچستان، خیبرپختونخوا اورآزاد کشمیر کے مختلف شہروں اوراسلام آباد سے بھی پیپلزپارٹی کے کارکن اوررہنما قافلوں کی صورت میں نوڈیرو روانہ ہوئے۔ سندھ کے مختلف علاقوں سے قافلے بھی آج نوڈیرو پہنچ جائیں گے، گڑھی خدابخش میں بے نظیربھٹو کی برسی کی تقریبات کے لئے سیکورٹی کے انتہائی سخت اتظامات کئے گئے ہیں اور چھ ہزار سے زائد سکیورٹی اہلکاروں کو تعینات کیا گیا ہے۔ کیمرے اور واک تھرو گیٹس نصب کئے گئے ہیں جبکہ علاقے کی فضائی نگرانی بھی کی جارہی ہے۔