کراچی (اسٹاف رپورٹر) شہیدرانی محترمہ بے نظیر بھٹو کا ویژن ہر حال میں پوراکریں گے،پاکستان پیپلزپارٹی کا ایک ایک جیالاچیئرمین بلاول بھٹوزرداری کی قیادت میں متحد اور متفق ہے، لیاقت باغ جلسہء عام میں شہید رانی سے تجدید عہد وفا کرینگے۔ یہ باتیں پاکستان پیپلز پارٹی ضلع سینٹرل کے سیکریٹری انفارمیشن شہزادمجید نے لیاقت باغ راولپنڈی روانگی سے قبل ساتھیوں سے بات چیت کرتے ہوئے کہیں۔انہوں نے کہاکہ پیپلزپارٹی نے پاکستان کی ترقی،خوشحالی، سلامتی اور استحکام کے لئے ہمیشہ قربانیاں دی ہیں اور یہ سلسلہ تاحال جاری ہے، وطن سے محبت کی پاداش میں پارٹی رہنمائوں کو قیدوبند کی صعوبتیں دی جارہی ہیں لیکن حکمران کسی خام خیالی میں نہ رہیں ہم نے جیلیں اور پھانسی گھاٹ دیکھے ہیں ہمیں ڈرایا اور دھمکایانہیں جاسکتا۔ انہوں نے کہاکہ آج پارٹی لیاقت باغ میں اپنا پاور شو کررہی ہے، دنیادیکھے گی شہید رانی محترمہ بے نظیر بھٹو کے جیالے ان سے کتنی عقیدت رکھتے ہیں۔