اچھرہ سے اغوا ہونیوالی دوبہنوں کے ورثاء اہل علاقہ کا احتجاجی مظاہرہ

لاہور(نامہ نگار )اچھرہ کے علاقہ سے گیارہ روز قبل اغواء ہونے والی دو بہنوں کے ورثاء اور اہل علاقہ نے گزشتہ رات فیروزپور روڑ بلاک کرکے شدید احتجاج کیا ہے۔تفصیلات کے مطابق اچھرہ کے علاقہ کچی آبادی،شاہ جمال کے رہائشی اللہ وسایا کی دو بیٹیاں 17 سالہ مسماۃ س اور 15 سالہ ث 16 دسمبر کو گھر سے سبزی لینے بازار گئیں،مگر گھر واپس نہ آئیں۔جس پر ان کے والد اللہ وسایا نے شکیل،رضیہ اور ان کے تین نامعلوم ساتھیوں کے خلاف اغواء کامقدمہ درج کرایا تھا۔مگر بچیاں تاحال بازیاب نہ ہو سکیں۔جس پربچیوں کے ورثاء اور اہل علاقہ نے گزشتہ رات ٹائرجلاکر فیروزپور روڑ بلاک کردیا اورشدید احتجاج کیا ہے۔ مظاہرین نے ہاتھوں میں پلے کارڈ اٹھا کر پولیس کے خلاف نعرے بازی کی۔فیروز پور روڑ بلاک ہونے سے یہاں ٹریفک کا نظام درہم برہم ہو گیا۔