برطانیہ کیساتھ تجارتی معاہدے کا جائزہ:  یورپی یونین کے سفیروں کا کل اجلاس ہوگا

لندن (عارف چودھری)یورپی یونین اور برطانیہ کے درمیان  تجارتی معاہدہ‘ اس معاہدے پر دستخط اور عمل درآمد کے لیے یورپی یونین منگل  سے مطلوبہ اقدامات کا آغاز کرے گی۔ اس پیش کش کو یورپی یونین کے سینئر مذاکرات کار میشیل بارنے نے رکن ممالک کے سامنے پیش کیا۔ ایک یورپی سفارت کار نے فرانسیسی خبر رساں ایجنسی کو بتایا کہ سمجھوتے کے غیر حتمی مسودے پر یورپی یونین کے رکن ممالک کے سفیروں کا رد عمل نارمل تھا۔اس حوالے سے کوئی بڑی مسرت نہیں تھی کیوں کہ بہرکیف طلاق کوئی خوش خبری نہیں ہے۔سفارت کار نے واضح کیا کہ 1200 صفحات پر مشتمل معاہدے کا پیر کے روز تک باریک بینی سے جائزہ لے لیا جائے گا۔یورپی یونین کے سفیر ایک بار پھر اکٹھا ہوں گے تا کہ معاہدے پر رکن ممالک کے دستخط کے اقدامات شروع کیے جا سکیں۔بعد ازاں اسے یورپی یونین میں منظوری کے لیے پیش کیا جائے گا۔رکن ممالک معاہدے کے متن کی منظوری دے کر منگل یا بدھ کے روز اس پر دستخط کریں گے تا کہ معاہدے کو جمعرات کے روز یورپی یونین کے سرکاری جریدے میں شائع کیا جا سکے۔ اس طرح معاہدہ یکم جنوری 2021 سے نافذ العمل ہو جائے گا۔یورپی یونین کے رکن ممالک عارضی طور پر دو ماہ کے لیے اس معاہدے پر عمل درآمد کے حوالے سے آمادہ ہو سکتے ہیں تا کہ سرکاری طور پر معاہدے کی منظوری کا عمل مکمل کیا جا سکے۔