لاہور (سپورٹس رپورٹر+لیڈی رپورٹر) گورنمنٹ کالج آف ہوم اکنامکس گلبرگ لاہور میں سالانہ سپورٹس ڈے منعقد ہوا۔ تقریب میں ایم پی اے صباءصادق نے بطور مہمان خصوصی شرکت کی۔ کھیل کے میدان کو رنگین غباروں سے سجایا گیا۔ سال اول، دوم، سوم، چہارم اور پنجم کی طالبات نے مارچ پاسٹ کیا۔ سو میٹر دوڑ، رسہ کشی، بوری ریس جیسے کھیل ہوئے۔ طالبات نے مقابلے کے دوران خوب مہارت کا مظاہرہ کیا۔ طالبات کے ساتھ ساتھ اساتذہ نے بھی کھیلوں میں بڑھ چڑھ کر حصہ لیا۔ میوزیکل چیئر کا کھیل مہمانوں اور کالج کی پرانی طالبات کیلئے تفریح کا باعث بنا۔ کالج کے ملازمین کو کھیلوں میں شرکت کا موقع دیا گیا۔ بی ایس اونرز اور ایم ایس سی کی طالبات نے منفرد انداز میں اروبکس کیا جو حاضرین کی توجہ کا مرکز بنے۔ تقریب کے اختتام پر مہمان خصوصی نے اول، دوم اور سوم پوزیشن حاصل کرنے والی طالبات میں انعامات تقسیم کئے۔