پیرمحل: آسمانی بجلی گرنے سے جاں بحق ہونیوالے تینوں بھائی آہوں اور سسکیوں کیساتھ سپردخاک

پیرمحل (نامہ نگار) آسمانی بجلی گرنے سے جاں بحق ہونے والے تینوں بھائیوں کو آہوں اور سسکیوں کیساتھ سپردخاک کردیا گیا۔ تفصیل کے مطابق گزشتہ روز شام محلہ لوئر کالونی کے بابا محمد انور کے 3 بیٹے نادر، ساجد اور حیدر موقع پر ہی آسمانی بجلی گرنے سے جاں بحق ہوگئے تھے۔ مرحومین سگے بھائیوں کی نمازجنازہ اقبال پارک میں ادا کی گئی جس میں اسسٹنٹ کمشنر سید جمیل حیدر شاہ، ڈی ایس پی سرکل پیرمحل سمیت سیاسی، سماجی، مذہبی، کاروباری اور صحافتی شخصیات کے علاوہ ہر مکتبہ فکر کے افراد نے کثیر تعداد میں شرکت کی۔ نماز جنازہ کے موقع مرحومین کے ورثاء غم سے نڈھال نظر آئے۔