بیلجیم میں پاکستانیوں کیلئے آن لائن کھلی کچہری، پاکستانی سفیر نے قونصلر سروسز سے آگاہ کیا

اسلا م آبا د (خصوصی نامہ نگار) بیلجیم، لکسمبرگ میں مقیم پاکستانیوں کیلئے آن لائن کھلی کچہری کاانعقاد۔ تفصیلا ت کے مطا بق یورپی یونین ،بلجیم اور لکسمبرگ میں پاکستان کے سفیر ظہیر اے جنجوعہ نے بیلجیم اور لکسمبرگ میں مقیم پاکستانیوں کے لئے چودھویں ماہانہ آن لائن کھلی کچہری کا انعقاد کیا۔ پاکستانی سفیر نے کمیونٹی کو موثر قونصلر خدمات فراہم کرنے کی مسلسل کوششوں سے آگاہ کیا۔ چیف آف آرمی سٹاف  کے دورے سمیت برسلز میں حالیہ اعلیٰ سطحی مصروفیات کا حوالہ دیتے ہوئے سفیر نے اس بات پر زور دیا کہ ان دوروں نے بیلجیم، یورپی یونین اور نیٹو کے ساتھ پاکستان کے دوطرفہ تعلقات کو مزید مضبوط بنانے میں اہم کردار ادا کیا ہے۔ انہوں نے مزید روشنی ڈالی کہ میزبان حکام نے افغانستان سے انخلاء کی کارروائیوں میں پاکستان کے کلیدی کردار کو سراہا۔یوم یکجہتی کشمیر کے حوالے سے کی جانے والی کوششوں کے بارے میں شرکاء کو بریفنگ دیتے ہوئے سفیر پاکستان نے سفارتخانے کی جانب سے کی جانے والی مختلف سرگرمیوں کی وضاحت کی۔