الخدمت فانڈیشن نے یتیم بچوں کے اقامتی ادارے آغوش ہالا کا افتتاح کر دیا

اسلام آباد(نا مہ نگار)الخدمت فانڈیشن کے کفالت یتامی پروگرام کے تحت 200یتیم بچوں کے اقامتی ادارے آغوش ہالا کا افتتاح کر دیا گیا۔ اس حوالے سے حیدرآباد سے 50کلومیٹر دورمرکزی قومی شاہراہ پر بھٹ شاہ سے چند منٹ کے فاصلے ہالا ضلع مٹیاری میں ایک افتتاحی تقریب کا انعقادکیا گیا۔ الخدمت فانڈیشن پاکستان کے صدر محمد عبدالشکوراور نائب امیر جماعت اسلامی پاکستان لیاقت بلوچ نے آغوش سینٹر کا افتتاح کیا۔ تقریب سے خطاب کرتے ہوئے محمد عبد الشکور نے کہا کہ آغوش ہالا یتیم بچوں کے لیے شاہکار عمارت کی تعمیر  خدمت انسانیت کے لیے بہترین مثا ل ہے،جس میں 200ذہین یتیم بچوں کو بہترین تعلیمی اور بورڈنگ سہولیات فراہم کی جارہی ہیں،انھوں نے کہا کہ ہمیں بحیثیت قوم ملکر یتیم بچوں کی فلاح وبہود کے لیے کام کرنا ہے۔ تقریب میں نائب صدر الخدمت فانڈیشن پاکستان سید احسان اللہ وقاص،نیشنل ڈائریکٹر الخدمت سماجی خدمات پروگرام عامر محمود چیمہ،صدر الخدمت  سندھ ڈاکٹر تبسم جعفری،سینئر مینجر الخدمت میڈیااینڈ پبلک ریلیشنز شعیب ہاشمی،نائب صدر سندھ آبادگار بورڈ سید ندیم احمد شاہ جاموٹ، ہالا کی سول سوسا ئٹی، شہر کی معروف سیاسی و سماجی شخصیات اور تمام شعبہ ہائے زندگی سے تعلق رکھنے والے افراد نے بڑی تعداد میں شرکت کی۔تقریب سے دیگر مہمانان نے بھی خطاب کیا۔تقریب کے اختتام پر معزز مہمانوں میں شیلڈز اور اجرک بھی تقسیم کی گئیں۔