کچے کے ڈاکوئوں کی لاہور کے شہری پر تشدد کی ویڈیو وائرل

لاہور (نامہ نگار) کچا کے علاقے میں ڈاکوؤں کے ہنی ٹریپ گینگز کی کارروائیاں زور پکڑنے لگیں۔ کچا کے گینگز لاہور، سرگودھا اور گوجرانوالہ سے کئی افراد کو سستی گاڑیوں کی فروخت اور لڑکیوں کے ذریعے فون پر دوستی کر کے اغواء کر چکے ہیں۔ لاہور کے اغوا ہونے والے60 سالہ تصور پر تشدد کی ویڈیوز سامنے آئی ہیں جبکہ ملزمان نے تاوان کی رقم ایک کروڑ سے بڑھا کر5 کروڑ کر دی ہے۔ ملزمان نے تصور حسین کی ویڈیو ورثاء کو بھجوائی اور رہائی کے بدلے5 کروڑ روپے تاوان مانگا جا رہا ہے۔ ورثا کے مطابق پولیس نے ملزمان کو پکڑنے میں بے بسی کا اعتراف کیا ہے۔ مغوی کے ورثاء کا کہنا ہے کہ والد پر بدترین تشدد کیا جا رہا ہے۔ مغویوں کو گھوٹکی اور کشمور کے علاقوں میں منتقل کیا جاتا ہے۔ جہاں قانون نافذ کرنے والے اداروں کی رسائی نہ ہونے کے برابر ہے۔
کچا/ اغوا