سلطانز کی شکست پر بیٹنگ لائن کا پوسٹ مارٹم ہوگا: مشتاق احمد

 لاہور(سپورٹس رپورٹر) پی ایس ایل 8 میں کراچی کنگز کے ہاتھوں شکست کھانے والی ٹیم ملتان سلطانز  کے اسسٹنٹ کوچ مشتاق احمد نے کہا ہے کہ جیت کا کریڈٹ کراچی کنگز کو دینا چاہیے، دفاعی انداز اپنانے کی وجہ سے ناکامی کا سامنا کرنا پڑا۔ ہم کنڈیشنز کا اندازہ لگانے میں ناکام رہے، ناقص بیٹنگ لائن کا پوسٹ مارٹم ہوگا، لیگ کے چھٹے میچ میں دوسری شکست سے ہمکنار ہونے والی ملتان سلطانز کی ٹیم ہدف کے تعاقب  میں اچھی بیٹنگ نہیں کرسکی۔ہم موسم کے اثرات کو نہیں سمجھ سکے، اچھی پچز سے کھیل کر آنے کے بعد قدرے مختلف وکٹ کی جانچ نہ کر سکے، خیال تھا کہ پچ شروع میں سپین بائولنگ کو سپورٹ کرے گی۔ پچ بعد میں سپن بائولنگ کیلئے ساز گار بنی اور اسی بات نے ہمیں ناکامی کی طرف دھکیلا، طیب طاہر نے ہمارے بائولرز کا اچھے انداز میں سامنا کیا۔حریف ٹیم کے انور علی اور احسان اللہ نے بہترین بائولنگ کرکے ہمیں سکور کرنے سے روکا، شکست پر ٹیم کا پوسٹ مارٹم ضرور کریں گے، وسیم اکرم ہو یا کوئی اور دوسرا بڑا کھلاڑی ہو، وہ گراؤنڈ سے باہر بیٹھ کر کچھ نہیں کرسکتا۔