لاہور (سپورٹس رپورٹر) پنجاب سپورٹس فیسٹیول  تحصیل لیول کے سلسلہ میں نشتر ٹائون میں  کبڈی کا ایونٹ یونین کونسل143نے جیت  لیا، نشتر کالونی میں ہونے والے ایونٹ میں12 ہزار سے زائد شائقین نے  شرکت کرکے  مقابلوں کو چار چاند لگا دیئے۔ کبڈی کا فائنل یونین کونسل 143اور یونین کونسل145 کے درمیان کھیلا گیا۔دونوں ٹیموں کے درمیان سخت مقابلے دیکھنے میں آیا ، پہلا ہاف 22-22کے ساتھ برابر رہا تاہم دوسرے ہاف میں یونین کونسل 143  نے پہلے ہاف کی نسبت  شاندار کھیل  پیش کیا  اور حریف سائیڈ کو ناکوں چنے چبوا  کر مقابلہ41-33 پوائنٹس کے ساتھ اپنے نام کیا۔فاتح ٹیم کی طرف سے محمد شاہد، افضال ، عمران میو، عثمان اورثاقب نے غیر معمولی کھیل کی ذریعے اپنی ٹیم کی کامیابی میں اہم کردار ادا کیا۔مہمان خصوصی ڈویژنل کنوینئر سپورٹس میاں نصیر احمد نے کھلاڑیوں میں انعامات تقسیم کئے۔ اس موقع پر میڈیا سے بات چیت میں انہوں نے کہا کہ مسلم لیگ(ن) کی حکومت نے  نوجوانوں  نسل کو ہمیشہ ترجیح دی ہے،آسان قرضوں کے بعد پنجاب یوتھ فیسٹول کے مقابلوں کا انعقاد وزیر اعلی پنجاب میاں شہباز شریف کا نوجوان کے لئے خصوصی تحفہ ہے۔