لاہور(نمائندہ سپورٹس+سپورٹس رپورٹر ) پاکستان اور نیوزی لینڈ کے درمیان ون ڈے سیریز کا دوسرا میچ کل نیپیئر میں کھیلا جائے گا۔ میچ پاکستانی وقت کے مطابق صبح 6بجے شروع ہوگا۔ نیوزی لینڈ کو سیریز میں ایک صفر کی برتری حاصل ہے ۔سیریز کا تیسرا ون ڈے میچ 31جنوری کو آکلینڈ میں کھیلا جائے گاجو صبح تین بجے شروع ہوگا۔میزبان ٹیم نے ٹی ٹونٹی سیریز بھی دو ایک سے جیتی تھی ۔مچل میکلنیگن کی جگہ ڈگ بریسویل کو پاکستان کے خلاف ون ڈے سکواڈ میں شامل کر لیا گیا ہے۔ میکلنیگن پہلے ون ڈے میں انور علی کے بائونسر پر زخمی ہو گئے تھے۔ میکلنیگن کی آنکھ کے قریب فریکچر ہو گیا ہے۔ کاسمیٹک سرجری کرانے کے لیے انھیں آرام دینے کا فیصلہ کیا گیا ہے۔ نیوزی لینڈ کے کوچ مائیک ہیسن نے بتایا کہ میکلینیگن کی صحت ٹیم کیلئے زیادہ ضروری ہے ۔ہماری سب سے پہلی ترجیح ان کی صحت یابی ہے اور مانیٹر کرینگے۔ڈگ نے اچھی کارکردگی کا مظاہرہ کیا ہے جس کی وجہ سے سکواڈکاحصہ بنایا گیاہے ۔ امید ہے وہ پاکستان کے خلاف سیریز میں بھی اچھا پرفارم کرینگے۔