لاہور(سپورٹس رپورٹر) دوسری چیئرمین واپڈا امیچور گالف چیمپئن شپ 2020ء کا ٹائٹل لاہور جم خانہ کے قاسم علی 221 گراس سکور کے ساتھ جیت لیا۔ لاہور جم خانہ گالف کورس میں جاری چیمپیئن شپ امیچورز میں غضنفر محمود نے دوسری اور ملتان کے عاشق حسین نے تیسری پوزیشن اپنے نام کی۔ نیٹ کیٹگری میں جم خانہ محسن ظفر نے پہلی، عمر فاروق نے دوسری جبکہ جمال ناصر نے تیسری پوزیشن اپنے نام کی۔ چیمپیئن شپ کی امیچور کیٹگری کی لانگ ڈرائیو سلمان جہانگیر نے جبکہ پن کے قریب ترین شاٹ اوکاڑہ کے فیصل صدیق نے لگائی۔ انویٹیشنل کیٹگری گراس میں جاوید اے خان اور نیٹ میں میجر جاہید اے خان نے پہلی پوزیشن حاصل کی۔ سینئرز کے گراس میں عمران احمد نے جبکہ نیٹ کیٹگری میں ڈاکٹر اے حامد اعوان پہلے نمبر پر رہے۔ لیڈیز گراس کیٹگری میں سنہا اسامہ نے پہلی، غزالہ یاسمین نے دوسری اور سعدیہ ایمان علی شاہ نے تیسری پوزیشن حاصل کی۔ نیٹ کیٹگری میں انا جیمز گل نے پہلی، مینا زینب نے دوسری جبکہ شہزادی گلفام نے تیسری پوزیشن حاصل کی۔ اختتامی تقریب کے مہمان خصوصی گورنر پنجاب چوہدری محمد سرور تھے جنہوں نے کامیاب گالفرز میں انعامات تقسیم کیے۔