لاہور(سپورٹس رپورٹر) سپورٹس بورڈ پنجاب کے زیراہتمام پہلی قائداعظم انٹر ڈویژن ہاکی چیمپئن شپ کے تیسرے روز مقابلوں میں کھلاڑیوں نے بھرپور کارکردگی کا مظاہرہ کیا۔ ملتان ، فیصل آباد، گوجرانوالہ، ساہیوال اور سرگودھا ڈویژن نے اپنی اپنی حریف ٹیموں کو شکست دی۔ ڈائریکٹرجنرل سپورٹس پنجاب عدنان ارشد اولکھ، سیکرٹری پنجاب اولمپک ایسوسی ایشن ادریس حیدر خواجہ ودیگر مہمانوں نے میچز دیکھے اور کھلاڑیوں کی حوصلہ افزائی کی۔ نیشنل ہاکی سٹیڈیم لاہور میں جاری چیمپیئن شپ کے پہلے میچ میں ملتان ڈویژن نے راولپنڈی ڈویژن کو چار ایک سے ہرایا۔ ملتان کی جانب سے عثمان افتخار، محمد اسامہ، محمد ارسلان اور کاشف صادق نے ایک ایک گول سکور کیا۔ راولپنڈی کے حمزہ فیاض نے گول کیا۔ دوسرے میچ میں فیصل آباد ڈویژن نے گوجرانوالہ ڈویژن کو دو صفر سے مات دی۔ فیصل آباد کی جانب سے دونوں گول شہباز احمد نے کیے۔ تیسرے میچ میں ساہیوال نے ڈیرہ غازی خان کو چار تین سے ہرایا۔ چوتھے میچ میں سرگودھا ڈویژن نے لاہور ڈویژن کو چار تین سے ہرایا۔