کلرسیداں(نامہ نگار)کلرسیداں میں کورونا زور پکڑ گیا گورنمنٹ گرلز ہائی سکول نمبر ون کلرسیداں کو دس ایام کے لیئے بند کردیا گیا ۔گورنمنٹ گرلز ہائی سکول سرصوبہ شاہ کے علاوہ بوائز پرائمری مدارس بسنتہ اور چھپر کے اساتذہ میں بھی کورونا کی شکایت پر آج محکمہ صحت کی ٹیمیں مدارس کا دورہ کریںگی۔ تفصیلات کے مطابق تحصیل کوارٹر ہسپتال کلرسیداں میں آٹھ ڈاکٹروں سمیت سٹاف کے بارہ ارکان کو کورونا رپورٹ مثبت آنے پر آئیسولیٹ کردیا گیا جبکہ ہسپتال سے ملحق پنڈی روڈ پر واقع گورنمنٹ گرلز ہائی سکول کلرسیداں کی تین معلمات کی کورونا رپورٹ مثبت آنے پر گرلز ہائی سکول کو ائندہ دس ایام کے لیئے بند کردیا گیا جبکہ گورنمنٹ گرلز ہائی سکول سرصوبہ شاہ،بوائز پرائمری مدارس چھپر اور بسنتہ کے اساتذہ میں بھی کورونا کی شکایات کے بعد محکمہ تعلیم نے محکمہ صحت کو وہاں کورونا ٹیسٹنگ کے لیئے تحریری طور پر درخواست کردی ہے ۔محکمہ صحت کی ٹیمیں آج ان مدارس کا دورہ کریں گی ۔