سہون کے قریب وین الٹنے سے 3 مسافر ہلاک‘17زخمی

سہون شریف (نامہ نگار ) سیہون کے قریب انڈس ہائی وے پر مسافر وین الٹنے کے باعث باپ بیٹی سمیت تین افراد جاں بحق اور 17افراد زخمی ہوگئے ، چار افراد کی حالت  تشویشناک بتائی جارہی ہے ۔تفصیلات کے مطابق سیہون تحصیل کے گا ئوں آراضی کے قریب انڈس ہائی وے پر سیتا روڈ سے حیدرآباد جانے والے تیز رفتار مسافر وین ٹائر پھٹنے کے باعث الٹ گئی جس کے نتیجے میں وین میںسوار 3مسافر جاں بحق اور 17 مسافر شدید زخمی ہوگئے ۔ موٹر وے پولیس اور بوبک پولیس پوسٹ کے جوانوں نے جائے وقوعہ پر پہنچ زخمیوں کو سید عبداللہ شاہ انسٹیٹیوٹ آف میڈیکل سائینسز  سیہون پہنچایا جہاں زخمیوں کو طبی امداد دی جارہی ہے  اسپتال انتظامیہ کے مطابق چار افراد کے حالت تشویشناک ہے ۔جاں بحق ہونے والوں میں محمد عیسٰی سولنگی ،ذکاء اللہ سولنگی اور اس کی تین سالا معصوم بیٹی صدف شامل ہیں جبکہ زخمیوں میں اعجاز احمد لغاری ،احمد لونڈ ،نیاز کھوسہ ،نسیماں لاکھیر ،سوہنی پنہور ،سونی سولنگی، افروز  سولنگی سمیت دیگر شامل ہیں جاں بحق ہونے اور زخمیوں کی تعلق سیتا روڈ ،اور گائوں مرید خان لاکھیر سے ہے ۔