لاہور (سپورٹس رپورٹر) سابق اولمپئن منظور الحسن نے گذشتہ روز ایشیا کپ کی تیاری کے لئے لاہور میں جاری قومی ہاکی ٹیم کے ممکنہ کھلاڑیوں کے تربیتی کیمپ کا دورہ کیا۔ اس موقع پر میڈیا سے گفتگو کرتے ہوئے منظورالحسن کا کہنا تھا کہ مجھے پاکستان ہاکی فیڈریشن کی جانب سے دعوت نہیں دی گئی تھی بلکہ ہیڈ کوچ اختر رسول کی دعوت پر آیا۔ انہوں نے کہا کہ پاکستان ٹیم ایشیا میں کامیابی حاصل کرنے کی صلاحیت رکھتی ہے تاہم لڑکوں کو ٹورنامنٹ کے تمام میچز پوری جان مار کر کھیلنا ہونگے۔ بار بار منیجر اور کوچ کی تبدیلی سے ٹیم کو نقصان ہوتا ہے۔ تعمیری تنقید سے گھبرانا نہیں چاہئے بلکہ اس کا جواب دینے کا اصل طریقہ یہ ہے کہ کامیابی حاصل کی جائے۔ ایشین چیمپئنز ٹرافی جیتنے کے بعد کھلاڑی گھروں میں آرام کرنے بیٹھ گئے تھے جبکہ یہی وقت تھا کہ جب کھلاڑیوں کو اگلے ٹورنامنٹ کی تیاری شروع کرا دی جاتی لیکن ایسا نہیں ہوا۔