عمران یا نواز شریف کہیں تب بھی کالاباغ ڈیم نہیں بن سکتا: نثار کھوڑو

کوٹری (آن لائن) سندھ کے وزیر آبپاشی اور اطلاعات نثار احمد کھوڑو نے کہا ہے کہ عمران خان یا نواز شریف کہیں تب بھی کالاباغ ڈیم نہیں بن سکتا۔ انہوں نے کہا کہ کالاباغ ڈیم پر چاروں صوبے متفق نہیں ہیں جبکہ بھاشا ڈیم منصوبے کے بارے میں سوچا جا سکتا ہے۔ کوٹری بیراج کے دورے کے موقع پر میڈیا کو بریفنگ دیتے ہوئے نثار کھوڑو کا کہنا تھا کہ آمرانہ دور کے نو سالوں میں عالمی مدد کے باوجود بھی بھاشا ڈیم نہیں بنایا جا سکا جس پر چاروں صوبے متفق تھے۔ انہوں نے کہا کہ مگر ایک ایشو اٹھا کر صوبوں کو لڑانے کی کوشش کی گئی جبکہ کالا باغ ڈیم بنانے پر کچھ اور ہی مفادات تھے۔صوبائی وزیر آبپاشی نے کہا کہ صوبوں کو لڑانے کے بجائے اس ڈیم کی تعمیر کی جائے جس پر تمام صوبے متفق ہیں۔ نثار کھوڑو نے کہا کہ پانی کی آمد سے سندھ کے آباد کاروں کو فائدہ ہی ہوگا۔