نیوجرسی ‘انٹرنیشنل چیمپئنز کپ لیور پول کے نام

کراچی (اسپورٹس رپورٹر)انٹرنیشنل چیمپئنز کپ لیول پول نے جیت لیا۔ نیوجرسی امریکہ میں کھیلے گئے دلچسپ میچ میں لیور پول نے مانچسٹر سٹی کو سپر اسٹار محمد صلاح اور سعیدو مان کی شاندار فنشنگ کی بدولت 2-1 گول سے شکست دی۔ اس سنسنی خیز مقابلے کو 52ہزار سے زائد شائقین نے دیکھا۔ مصر کے سپراسٹار محمد صلاح جو انجری کی وجہ سے عالمی کپ میں مصر کی مدد نہیں کرسکے تھے نے اپنے کلب لیور پول کی فتوحات میں اپنا حصہ جاری رکھا۔ عالمی کپ کے بعد محمدصلاح اور سینیگال کے سپراسٹار سعیدو مان پہلی بار اپنے کلب کی جانب سے ایکشن میں آئے۔ مانچسٹر کی جانب سے سولنکی نے اپنی ٹیم کو برتری دلادی۔ ایک گول کے خسارے میں جانے کے بعد لیول پول کی جانب سے متبادل کھلاڑی کی حیثیت سے فیلڈ میں آنے والے محمدصلاح نے رافا کے کراس پر گول اسکور کرکے اسکور ایک ایک گول سے برابر کردیا۔ بعدازاں سولنکی کے ایک خطرناک فائول پر ریفری نے لیول پول کو پینلٹی کک ایوارڈ کی جس پر سعیدومان نے فیصلہ کن گول اسکور کرکے لیول پول کو 2-1 گول سے فتح دلادی۔