لاہور + مانگا منڈی (خصوصی رپورٹر+ نامہ نگار) این اے 124 پی پی147 میں انتخاب کے غیر حتمی اور غیر سرکاری نتائج سامنے آنے کاسلسلہ شروع ہوتے ہی مسلم لیگ (ن)کے کارکن مرکزی انتخابی دفتر شازو پہنچ جمع ہو کر ڈھول کی تھاپ پر بھنگڑے ڈالتے ہوئے اپنی اپنی قیادت کے حق میں نعرے بازی کرتے رہے، حمزہ شہباز شریف، مجتبیٰ شجاع الرحمن کی واضح برتری سامنے آنے پر مٹھائیاں تقسیم کر دی گئیں اور آتش بازی کا مظاہرہ بھی کیا گیا، مسلم لیگ (ن) کے کارکنوں نے اپنی قیادت کے حق میں مختلف مقامات پر ریلیاں بھی نکالیں، زندہ دلان لاہور نے اپنی روایت کو برقرار رکھتے ہوئے انتخاب کے نتائج جاننے کے لئے رات جشن منا کر گزاری۔ کارکن رزلٹ کے دوران حق میں نتیجہ آنے پر گو عمران گو کے نعروں کے ساتھ اپنی قیادت کی پذیرائی کرتے رہے۔ مختلف افراد کی جانب سے میاں مجتبیٰ شجاع الرحمن کی کامیابی پر ان کی رہائشگاہ پر مٹھائی کی ٹوکریاں بھجوائی گئیں۔ دریں اثناء حلقہ این اے 136 سے مسلم لیگ (ن) کے ملک افضل کھوکھر کی جیت کی خوشی میں یو سی 265 کے چئیرمین محمد طارق بٹ کی قیادت میں ایک بہت بڑی ریلی نکالی گئی۔ جس میں یو سی کے کونسلروں غلام رسول، ملک گلزار احمد، حاجی محمد ارشد وغیرہ کے علاوہ سینکڑوں مسلم لیگیوں نے شرکت کی اور ڈھول کی تھاپ میں بھنگڑے ڈالے۔