پیرس اولمپکس:پاکستانی اتھلیٹس  آج سے ایکشن میں نظر آئیں گے

لاہور(سپورٹس رپورٹر)پیرس اولمپکس میں پاکستانی اتھلیٹس کا سفر آج سے شروع ہوگا۔ پاکستان کے 2 اتھلیٹس شوٹنگ کے مقابلوں میں ایکشن میں ہوں گے۔دن ڈیڑھ بجے شوٹر گلفام جوزف 10 میٹر ائیرپسٹل کے ابتدائی راؤنڈ میں شریک ہونگے۔مردوں کے 10 میٹر ائیر پسٹل مقابلوں میں گلفام سمیت 33 شوٹرز شرکت کریں گے۔ابتدائی راؤنڈ میں پلیئرز 10، 10 نشانوں کی 6 سیریز میں حصہ لیں گے۔ ابتدائی 6 سیریز کے بعد ٹاپ 9 شوٹرز فائنل راؤنڈ کیلئے کوالیفائی کریں گے۔ کشمالہ طلعت خواتین کی 10 میٹر ائیرپسٹل ایونٹ میں ایکشن میں ہوں گی۔ان کا ایونٹ پاکستانی وقت کے مطابق دن ساڑھے 3 بجے ہوگا۔ٹاپ 8 کی جنگ میں کشمالہ طلعت کا 44 شوٹرز سے مقابلہ ہوگا۔ کوالیفائی کرنے کی صورت میں دونوں کے فائنل راؤنڈز 28 جولائی کو ہوں گے۔