لاکھوں عازمین حج کی میدان عرفات آمد، رکن اعظم وقوف عرفہ آج اداکیا جائےگامسجد نمرہ سے خطبہ حج کو 20 زبانوں میں ترجمہ کرنے کی تیاریاں مکمل کرلی گئیں ہیں مناسک حج کے دوران  منیٰ کی عارضی خیمہ بستی میں 8 ذو الحج کا پورا دن قیام کے دوران پانچوں وقت کی نمازیں ادا کر کے دنیا بھر سے آئے  لاکھوں عازمین لبیک اللھم لبیک کی صدائیں بلند کرتے حج کے رکن اعظم وقوف عرفہ کیلئے 9 ذوالحج کو نماز فجرکی ادائیگی کے بعد میدان عرفات روانہ ہو رہے ہیں۔میدان عرفات میں حج کا رکن اعظم  وقوف عرفہ آج  اداکیا جائےگا جہاں  حجاج کرام مسجد نمرہ  سے خطبہ حج سنیں گے اور  ظہر و عصر کی نمازیں یکجا کرکے ایک ساتھ ادا کریں گے۔خطبہ حج شیخ ڈاکٹر یوسف بن محمد بن سعید دیں گے. حرمین انتظامیہ  کے مطابق  ایوان شاہی کی منظوری سے امسال میدان عرفات کی مسجد نمرہ سے شیخ ڈاکٹر یوسف بن محمدبن سعید خطبہ حج دیں گے، خطبہ حج کا ترجمہ اردو سمیت دنیا کی متعدد زبانوں میں براہ راست نشر کیا جاتا ہے۔مسجد نمرہ سے خطبہ حج کو   20 زبانوں میں ترجمہ کرنے کی تیاریاں مکمل کرلی گئی  ہیں، عازمین میدان عرفات میں نماز ظہرین ادا کریں گے، دن بھر  ذکر اذکارکریں گے اور اپنی و امت مسلمہ کی بخشش کیلئے خصوصی دعائیں کریں گے اور  اذان مغرب کے بعد میدان عرفات سے مزدلفہ روانہ ہوں گے جہاں وہ نمازمغرب اورعشاء ملا کرادا کریں گے۔ عازمین حج رات بھر مزدلفہ میں کھلے آسمان تلے عبادت اور ذکر و اذکار کرتے ہوئے رات گزاریں گے اور شیطان کو مارنے کے لیے کنکریاں جمع کریں گے۔10 ذی الحج کو نمازفجر کے بعد مزدلفہ سے واپس منیٰ روانہ ہوں گے اور حضرت ابراہیم کی سنت کی پیروی میں رمی جمرات کریں گے، شیطان کو کنکریاں مارنے کے بعد قربانی کریں گے، قربانی کے بعد حاجی احرام اتار دیں گے اور بال منڈوا کر طواف زیارت کے لیے مسجد الحرام جائیں گے،  عازمین حج خانہ کعبہ  جا کر طواف زیارت کریں گے اور واپس منیٰ جا کر ایام تشریق گزاریں گے ۔عرب میڈیا کی ایک رپورٹ کے مطابق  دنیا کےکونے کونے سے  آنے والے عازمین حج  9 ذی الحجہ  کو  حج کے رکن اعظم  وقوف عرفہ کیلئے عرفات کے میدان میں جمع ہوتے ہیں ، میدان عرفات مکہ سے مشرق کی جانب طائف کی راہ پر 21 کلو میٹر دور  ایک بڑا وسیع و عریض میدان ہے میدان عرفات کا رقبہ 33 مربع کلو میٹر ہے۔