وہاب ریاض کاکلمہ چوک ، جنرل ہسپتال میں نکاسی آب کا جا ئزہ، ہدایات جاری

لاہور(سپورٹس رپورٹر)وزیراعلیٰ پنجاب کے مشیر برائے کھیل وامور نوجوانان وہاب ریاض نے گزشتہ روز شہرمیں ہونیوالی شدید بارش کے بعد کلمہ چوک اور جنرل ہسپتال کے مقامات پرنکاسی آب کا جا ئزہ لیا اور فوری طور پر پانی نکالنے کی ہدایات جاری کیں۔ اس موقع پر کمشنر لاہور محمدعلی رندھاوا بھی موجود تھے۔ میڈیا سے گفتگو کرتے ہوئے انہوں نے کہا ہے کہ مسئلے کا جائزہ لیا جارہاہے کہ پانی کھڑا کیوں ہوا ہے ۔سارا عملہ یہاں بلایا ہے،جائزہ لے رہے ہیں کہ کلمہ چوک نیا تیار ہوا ہے پھر پا نی کھڑا ہونے کی وجہ کیا ہے۔ اس کی مکمل انکوائری کی جائے گی۔مشیر برائے کھیل وامور نوجوانان وہاب ریاض نے مزید کہا ہے کہ عوام کو اس سے مسائل کا سامنا کرنا پڑ رہا ہے،عوام کے مسائل حل کرنے کے لئے اقدامات اٹھارہے ہیں۔