ٹی ٹوئنٹی ورلڈ کپ میں قومی کرکٹ ٹیم کی کارکردگی سے متعلق رپورٹ چیئرمین پی سی بی کو جمع کرادی گئی ہے۔ذرائع کے مطابق سینئر مینجر وہاب ریاض نے ٹیم کی کارکردگی رپورٹ جمع کروائی،رپورٹ میں ٹیم کے سپر ایٹ رائونڈ تک نہ پہنچنے کی وجوہات بیان کی گئی ہیں۔رپورٹ میں قومی کرکٹ ٹیم کی امریکہ اور بھارت کے خلاف شکست پر بھی وضاحت دی گئی ہے۔ذرائع کا کہنا ہے چیئرمین پی سی بی محسن نقوی رپورٹ کا تفصیلی جائزہ لینے کے بعد اہم فیصلے کرینگے۔
دوسری جانب پاکستان کرکٹ ٹیم کے کپتان بابر اعظم آئی سی سی ٹی ٹوئنٹی ورلڈکپ میں شرکت کے بعد امریکا سے وطن واپس پہنچ گئے۔کپتان بابر اعظم نیو یارک سے براستہ دبئی لاہور پہنچے۔ بابر اعظم کے بھائیوں نے علامہ اقبال انٹرنیشنل ایئرپورٹ پر انکا استقبال کیا۔ذرائع کا کہنا ہے کہ کپتان بابر اعظم آئندہ چند روز میں چیئرمین پاکستان کرکٹ بورڈ (پی سی بی) محسن نقوی سے ملاقات کریں گے۔
خیال رہے کہ ٹی ٹوئنٹی ورلڈکپ میں گروپ اسٹیجز سے ہی باہر ہوجانے کے بعد قومی ٹیم وطن واپس پہنچ گئی تھی جبکہ بابر اعظم امریکا میں ہی رُک گئے تھے۔
