نابلس (اے این این )فلسطین کے مقبوضہ مغربی کنارے کے شمالی شہر نابلس میں کالونی کے قریب قائم اسرائیلی فوج کی ایک چیک پوسٹ پر فلسطینی پرچم لہرادیا۔عینی شاہدین کے مطابق فلسطینی شہریوں نے جنوبی نابلس میں حوارہ کے مقام پر نہ صرف صہیونی فوجی چوکی پر فلسطینی پرچم لہرایا بلکہ چوکی کی دیواروں پر اسرائیلی دہشت گردی کی مذمت میں نعرے بھی تحریر کرڈالے۔واقعے کے فوری بعد اسرائیلی فوجیوں نے فلسطینی شہریوں کو پکڑنے کی کوشش کی تاہم وہ جائے وقوعہ سے بحفاظت فرار ہوگیا۔ اسرائیلی فوج نے فلسطینی نوجوانوں کی تلاشی کے لیے حوارہ کی تمام سڑکیں جام کردیں جس کے نتیجے میں سڑکوں پر ٹریفک کی روانی میں بھی مشکلات پیدا ہوئیں۔