لاہور(سپورٹس رپورٹر)آسٹریلیا کی وائٹ بال ٹیم میں شامل آل راؤنڈر مچل مارش نے کہا ہے کہ پاکستان انٹرنیشنل کرکٹ کیلئے بہترین جگہ ہے اور یہاں کرکٹ ہونی چاہیے۔لاہور میں آن لائن پریس کانفرنس کرتے ہوئے مچل مارش کا کہنا تھا کل جیت کی خوشی منائی سب نے اکٹھے ڈنر کیا، جیت کو بہت انجوائے کیا اور اب سب تازہ دم ہیں۔ دورہ پاکستان میں یہ جیت بڑی شاندار رہی جو سیریز کے آخری سیشن میں ملی، مستقبل میں برصغیر کے ٹورز ہیں اور اس سیریز کی جیت کا فائدہ ہو گا۔ اب فوکس ون ڈے سیریز پر ہے، سیریز سے قبل ٹریننگ سیشن بھی ملیں گے، ون ڈے سیریز بھی ٹیسٹ سیریز کی طرح بہت اچھی ہو گی، ٹیسٹ سیریز اچھی سپرٹ میں کھیلی گئی، اب یہ سیریز بھی شاندار ہو گی۔ وائٹ بال سیریز سے پہلے مجھے بریک ملی جس کا فائدہ ہو گا، میں نے سیریز سے قبل فیملی کیساتھ وقت گزارا، پھر وائٹ بال سیریز کی تیاری کی۔انہوں نے کہا کہ سٹیو سمتھ جیسے کھلاڑی کے نہ ہونے کا مطلب ہے کہ آپ نے تجربہ کار کھلاڑی کھو دیا، پاکستان وائٹ بال ٹیم بہت اچھی ہے اور ہم سب کے پاس موقع ہے کہ اچھا پرفارم کریں۔ آسٹریلیا وائٹ بال کی ایک نئی ٹیم ہے جبکہ پاکستان ٹیم تجربہ کار ہے، لاہور میں ہائی سکورنگ میچ ہوں گے اور اوس کا کردار بھی اہم ہو گا۔پاکستان کے حوالے سے بات کرتے ہوئے مچل مارش کا کہنا تھا کہ پاکستان کے لوگ بہت اچھے ہیں اور ہمارا اچھا خیال رکھا جا رہا ہے، ہوٹل بہت اچھا ہے اور ہمیں بہت محفوظ رکھا جارہا ہے۔ پاکستان کرکٹ کیلئے اچھی جگہ ہے، ٹیم بھی بہت اچھی ہے، انٹرنیشنل کرکٹ ہونی چاہیے۔ میرے والد نے دورہ پاکستان کے حوالے سے مجھ سے گفتگو کی، اس دور کے مقابلے میں کرکٹ مختلف ہے، اب میں بھی یہاں کرکٹ انجوائے کروں گا۔پاکستان اور آسٹریلیا کے ون ڈے سکواڈ ز آج سے ٹریننگ سیشن شروع کریں گے ۔ واضح رہے کہ پاکستان اور آسٹریلیا کے درمیان تین ون ڈے اور ایک ٹی ٹونٹی انٹرنیشنل میچز کی سیریز 29 مارچ سے 5 اپریل تک قذافی سٹیڈیم لاہور میں کھیلی جائے گی۔ پاکستان اور آسٹریلیا کی ٹیمیں آج ٹریننگ کا آغاز کریں گی ۔ ٹیموں کا ٹریننگ سیشن ساڑھے چار بجے قذافی سٹیڈیم شروع ہو گا۔کل پیر کو بھی دونوں ٹیمیں قذافی سٹیڈیم میں دوسرا ٹریننگ سیشن کریں گی ۔