لاہور(سپورٹس ڈیسک)سعودی عرب کی خواتین کی فٹبال ٹیم کو باضابطہ طور پر فیفا کی درجہ بندی میں شامل کر لیا گیا۔ اپنے قیام کے صرف 18 ماہ کے بعد سعودی خواتین کی ٹیم شاندار نتائج حاصل کرنے میں کامیاب ہوئی ہے۔ویمنز فٹ بال ایڈمنسٹریشن نے سوشل میڈیا پر لکھا ہے کہ ہمیں فخر ہے کہ ہماری خواتین کی قومی ٹیم فیفا کی درجہ بندی میں شامل ہو گئی ہے۔2021ءمیں اپنے قیام کے بعد سے خواتین کی قومی ٹیم نے 9 میچز کھیلے، سعودی ٹیم اب فیفا اور ایشین فٹبال کنفیڈریشن سے منظور شدہ ٹورنامنٹس میں شرکت کر سکے گی۔سعودی فٹ بال ایسوسی ایشن کے صدر اور فیفا کونسل کے رکن یاسر المسحل نے کہا ہے کہ قومی ٹیم کے کھلاڑیوں نے صرف ڈیڑھ سال میں جو کچھ حاصل کیا وہ ایک بہت بڑی کامیابی ہے۔ یہ ایک تاریخی لمحہ ہے، یہ کامیابی کھیلوں کے شعبے میں بالعموم اور فٹبال میں بالخصوص سعودی رہنماو¿ں کی دلچسپی اور سرمایہ کاری کا نتیجہ ہے۔سعودی فیڈریشن کے بورڈ آف ڈائریکٹرز کی رکن اور ویمنز فٹ بال مینجمنٹ کی جنرل سپروائزر لمیاءبنت ابراہیم بن بہیان نے کہا کہ خواتین کی قومی ٹیم نے فیفا کی درجہ بندی میں مختصر عرصے میں اور ممتاز درجے پر داخل ہو کر تاریخ رقم کی ہے۔ انہوں نے قومی ٹیم کے تکنیکی اور انتظامی عملے کے شاندار کام کی بھی تعریف کی اور مزید کامیابیاں حاصل کرنے کےلئے آنے والے دور میں کوششوں کو دگنا کرنے کی اہمیت پر زور دیا۔