لاہور(سپورٹس رپورٹر) پاکستان کرکٹ بورڈ نے نئے ہیڈ کوچ کیلئے نیوزی لینڈ کیاسسٹنٹ کوچ لیوک رونکی سے رابطہ کیا ہے۔ذرائع کے مطابق پی سی بی نے مینز کرکٹ ٹیم کے نئے ہیڈ کوچ کیلئے نیوزی لینڈ کے اسسٹنٹ کوچ لیوک رونکی سے رابطہ کیا تاہم پی سی بی کی پیشکش پر لیوک رونکی نے جواب دینے کیلئے وقت مانگ لیا ہے۔ذرائع کا کہنا ہے کہ لیوک رونکی نے گزشتہ سال پی سی بی کی پیشکش پر انکارکردیا تھا جس کے بعد بریڈ برن ہیڈ کوچ بنے تھے۔واضح رہے کہ لیوک رونکی پی ایس ایل میں اسلام آباد یونائیٹڈ کی نمائندگی کرچکے ہیں۔اس سے قبل مینز کرکٹ ٹیم کی کوچنگ کیلئے آسٹریلیا کے سابق کرکٹر شین واٹسن اور ویسٹ انڈیز ٹیم کے سابق کپتان ڈیرن سیمی بھی پی سی بی کی پیشکش کو مسترد کرچکے ہیں۔