ملتان، لاڑکانہ(آئی این پی،نوائے وقت) ملتان پولیس اور حساس اداروں نے مختلف علاقوں میں سرچ آپریشن کرتے ہوئے 8افراد کو گرفتار کر لیا۔ تفصیلات کے مطابق پولیس اور جوائنٹ ٹاسک ٹیم نے تھانہ قطب پور کے علاقہ جموں والا اور گردونواح سرچ آپریشن کیا۔ سرچ آپریشن کے دوران 140گھروں کی تلاشی لی گئی اور 230افراد کی جدید طریقہ سے (بائیو میٹرک) تصدیق کی گئی ۔ پولیس سرچ آپریشن کے دوران بڑی مقدار میں منشیات برآمد کی گئی۔ پولیس ترجمان کے مطابق منشیات فروشوں سے 40لیٹر شراب اور ایک کلو 700گرام چرس بھی برآمد کر لی گئی ہے۔ سی ٹی ڈی نے لاڑکانہ کے علاقے گوٹھ سنجرانی سے کالعدم تنظیم کا دہشت گرد گرفتار کر لیا۔ سی ٹی ڈی حکام کے مطابق گرفتار دہشت گرد کا تعلق کالعدم لشکر جھنگوی سے ہغے ملزم جاوید پر دہشت گردی کی کارروائیوں کیلئے چندہ اکٹھا کرنے اور فوجداری مقدمات سمیت دیگر سنگین مقدمات درج ہیں۔